ಬಸವ ಸ್ತೋತ್ರ ತ್ರಿವಿಧಿ

*

ಸಿದ್ಧರಾಮೇಶ್ವರರು ರಚಿಸಿರುವ ಬಸವ ಸ್ತೋತ್ರ ತ್ರಿವಿಧಿ

ಬಸವೇಶನೆ ಬಸವರಾಜನೆ |
ಬಸವಣ್ಣನೆ, ಬಸವ ತಂದೆ, ಬಸವ ಕೃಪಾನಿಧಿ ||
ಬಸವ ಪರಮೇಶ್ವರೀಶ್ವರ |
ಬಸವ ಪ್ರಮಥಾದಿ ದೇವ ರಕ್ಷಿಸು ಬಸವ ||


ಪ್ರಥಮಂತು ಬಸವಣ್ಣ ದ್ವಿತಿಯಂತು ಲಿಂಗವು
ತೃತಿಯಂತು ತತ್ವ ಬ್ರಹ್ಮಾಂಡವೆಲ್ಲ
ಅಕಳಂಕ ಗುಣನಿಧಿ ಚಿದಾನಂದ ಬಸವಂಗೆ
ಬಕುತನಾದೆನ ಗುರುವೆ ಯೋಗಿನಾಥ

ವಸುಧೆಯಿಲ್ಲದ ಮುನ್ನ ದೆಸೆಯೆಂಟ ನಿರ್ಮಿಸಿದ
ಶಶಿ ರವಿಗಳೆಂಬವರ ನಾಮವಿಲ್ಲ
ವಶವಲ್ಲದಾನತದ ದೆಸೆಗೆಟ್ಟಲಿಂಗವನು
ಹೆಸರಿಟ್ಟ ಗುರು ಬಸವ ಯೋಗಿನಾಥ

ವಸುಧೆ ಹುಟ್ಟಿದ ಮುನ್ನ ಬಸವಣ್ಣ ಹುಟ್ಟಿದನು
ಶಶಿಧರನು ಶಿವಮೂರ್ತಿ ವರದನಯ್ಯ
ಅಸಮಾಕ್ಷನವತಾರ ಮೂರ್ತಿತಾಳಿದ ಗುರು
ಬಸವಣ್ಣ ಬಸವಯ್ಯ ಯೋಗಿನಾಥ.

ತ್ರೈಭುವನ, ತ್ರೈಲೋಕ ತ್ರೈಜಗವು ತ್ರೈತತ್ವ
ತ್ರೈರೂಪು, ತ್ರೈಭಾವ, ತ್ರೈಶಕ್ತಿಯ
ತ್ರೈಗೃಹದ ತ್ರೈಲಿಂಗ ಮಾಡಿ ನಿಂದನು ಎನ್ನ
ತ್ರೈಮೂರ್ತಿ ಬಸವನೈ ಯೋಗಿನಾಥ

ಆದಿಯಾಧಾರದಲ್ಲಿ ಆದ ಪಂಚಮ ಸೀಮೆ
ಗ್ರಾಮವೆಂಟನು ನೋಡಿ ಹತ್ತನೊಡಿ
ಸೀಮೆ ಸಾಯುಜ್ಯದಲ್ಲಿ ಸಂಗಮವು ಆದಡೆ
ಆ ಬಸವ ಪುತ್ರನೈ ಯೋಗಿನಾಥ

ಬಸವನೇ ಜಗದಾದಿ ತತ್ವಕ್ಕತೀತನು
ಬಸವನೇ ಪರಬ್ರಹ್ಮಸ್ವರೂಪನು
ಬಸವನನಾದಿಲಿಂಗ, ಬಸವನನಾದಿ ಚರ |
ಬಸವನಿಂದಧಿಕವುಂಟೇ ಯೋಗಿನಾಥ?

ಬಸವನೇ ಸತ್ಯಾಂಗ, ಬಸವನೇ ನಿತ್ಯಾಂಗ
ಬಸವನೇ ಪರಮ ಚಿತ್‌ ಸ್ವರೂಪನು ||
ಬಸವನನಾದಿಲಿಂಗ ಬಸವನನಾದಿ ಗುರು
ಬಸವನಿಂದಧಿಕವುಂಟೆ ಯೋಗಿನಾಥ.

ಬಸವನನಾದಿ ಗುರು | ಬಸವನನಾದಿಲಿಂಗ
ಬಸವನನಾದಿ ಚರ ಪರಮ ಭಕ್ತ
ಬಸವನನಾದಿ ಗುರು ಚರ ತ್ರಿವಿಧ ರೂಪಾದ
ಬಸವಂಗೆ ಶರಣಾದೆ ಯೋಗಿನಾಥ.

ಆದಿ ಗುರು ಬಸವಣ್ಣ | ಅನಾದಿ ಗುರು ಬಸವಣ್ಣ
ಭೇದಕ್ಕಭೇದ್ಯನು ಬಸವಣ್ಣನು
ಇಂತಪ್ಪ ಬಸವನನಂತ ಶ್ರೀಪಾದಕ್ಕೆ
ಇಂತೆರಗಿ ಸುಖಿಯಪ್ಪೆ ಯೋಗಿನಾಥ

ಶರಣು ಸತ್ಪಥ ಬಸವ | ಶರಣು ನಿಜಗುರು ಬಸವ
ಶರಣು ಬಸವ ಜ್ಞಾನ ಶರಣು ಬಸವ ||
ಶರಣು ನಿರ್ಮಲ ನಿಜ ಗುರು ಲಿಂಗ ಬಸವೇಶ
ಶರಣೆಂಬೆ ನಿಮ್ಮಡಿಗೆ ಯೋಗಿನಾಥ.

ಬಸವನ ಯೋಗದಿಂ | ಹಸನಾಯಿತೈ ಲೋಕ
ಬಸವ ಗತಿಯೆನಲು ಹಿಂಗುವುದು ಭವವು
ಬಸವಯ್ಯ ಬಸವಣ್ಣ ಶರಣಾರ್ಥಿ ಎಂದೆನುತ
ಬಸವ ಬದುಕಿದೆನಯ್ಯ ಯೋಗಿನಾಥ.


ಬಸವನಿಂದೀಯಾತ್ಮ | ವಸುಧೆ ಮುಟ್ಟಿತು
ಬಸವನೇ ಶಿವಭಕ್ತಿ ಬೀಜವಾಗಿ ||
ಬಸವನೆ ಕರುಣದಿಂದಾನು ಬದುಕಿದೆನಯ್ಯ
ಬಸವನಿಂದಾನಾದೆ ಯೋಗಿನಾಥ.

ಬಸವ ಭಕ್ತರ ತನುವಿ | ನಸುವ ಸಂತೈಸಿರಲು |
ಮುಸಿಕಿತ್ತು ಮಹ ಘನವು ತನು ಪ್ರಾಣವ ||
ಬಸವನೇ ಗುರು ಲಿಂಗ ಚರಶೇಷವೆಂದರಿದು |
ಬಸವ ಬಸವಾ ಎಂಬೆ ಯೋಗಿನಾಥ.

ಅಂದು ಆದಿಯಲಾದ | ಆನಂದ ಭಸಿತವನು |
ತಂದೆನ್ನ ನೊಸಲಲ್ಲಿ ಪಟ್ಟಗಟ್ಟಿ ||
ತಂದೆ ಗುರು ಬಸವಣ್ಣನೆನ್ನ ರಕ್ಷಿಸಲಾಗಿ |
ಇಂದು ನಿಮ್ಮೊಳು ಬೆರೆದೆ ಯೋಗಿನಾಥ.

ಆಧಾರ ಭಸಿತವನು | ಓದಿ ಕರದಲಿ ಪಿಡಿದು
ಅನಾದಿ ಬಸವನೆ ಗತಿಯು ಎನ್ನುವಾತ ||
ಆದಿಯನಾದಿಯಿಂದತ್ತತ್ತಲಿಂ ಮುನ್ನ
ಅನಾದಿ ಜಂಗಮ ತಾನೆ ಯೋಗಿನಾಥ.

ಆದಿಗುರು ಬಸವಣ್ಣ ಅನಾದಿಗುರು ಬಸವಣ್ಣ
ಭೇದಕ್ಕಭೇದ್ಯನು ಬಸವಣ್ಣನು
ನಾದ ಬಿಂದು ಕಳಾತೀತ ಬಸವಯ್ಯ
ಎನ್ನಾರಾಧ್ಯಗುರು ಬಸವ ಯೋಗಿನಾಥ

ಬಸವಣ್ಣ ಬಸವಯ್ಯ ಬಸವಪ್ಪ ಬಸವರಸ
ಬಸವ ಲಿಂಗವೆ ಎನ್ನ ಬಸವ ತಂದೆ
ಬಸವ ಚರ ಪರತತ್ವಕಾದಿ ಮೂಲಿಗ ಲಿಂಗ
ಬಸವಪ್ಪ ಶರಣೆಂಬೆ ಯೋಗಿನಾಥ

ಲಿಂಗ ನೀನೇ ಎನ್ನ ಜಂಗಮವು ನೀನನ್ನ
ಸಂಗ ಸಮಯೋಪಕರ ನೀನೆಯಯ್ಯಾ
ಅಂಗಚರ ಪರಮಗುರು ನೀನೇ ಬಸವ
ಲಿಂಗೆ ನೀ ಸಲಹಯ್ಯ ಯೋಗಿನಾಥ

ಕಾಯಗುಣದಪಹಾರಿ ಕಲ್ಲಷಮನ ಸಂಹಾರಿ
ದಾಯದೋರಿಯ ಭಕ್ತಿದಾಯಕ ನೀನು
ಕಾಯಗುಣಗಳ ಕಳೆದು ರಾಯ ಶಿವಪ
ವೀಯೊ ದೇವ ಶ್ರೀ ಗುರುಬಸವ ಯೋಗಿನಾಥ

ಇಂದು ಶಿವಶರಣರ ಹೊಂದಿ ಹಾರೈಸಿದೆ
ತಂದೆ ನಿಮ್ಮಯ ಕರುಣಪ್ರಸಾದವ
ಇಂದು ನಿಮ್ಮಯ ಕರುಣದಿಂದಿತ್ತು ಸಲಹಯ್ಯ
ತಂದೆ ನೀ ಬಸವಯ್ಯ ಯೋಗಿನಾಥ

ಎರಡಂಟನರಿಯದ ಮರುಳು ಮಾನವನಿಗೆ
ಕರಿಮಸ್ತಕದ ಮುತ್ತನಿತ್ತು ಕರಕೆ
ಪರಮ ಪ್ರಸಾದವನು ಪಾಲಿಸಿ ರಕ್ಷಿಸಿದೆ
ಪರಮ ಶ್ರೀಗುರುಬಸವ ಯೋಗಿನಾಥ

ಕಾಯಯ್ಯ ಬಸವಯ್ಯ ಈಯಯ್ಯ ಬಸವಯ್ಯ
ಬೆವ ತಾಪತ್ರಯದ ಭವದುಃಖಿಯ
ಆಯಾಸವಿಲ್ಲದೆ ಸತಿ ಸುಖವನಿತ್ತೆನ್ನ
ಕಾಯಯ್ಯ ಗುರುಬಸವ ಯೋಗಿನಾಥ

ತೊತ್ತಿನ ಮಗನೆ ನೀನಿತ್ತ ಬಾರೆಂದೆನ್ನ
ನೆತ್ತಿ ಸಲಹಿದ ಗುರುವೆ ಬಸವ ಪ್ರಭುವೆ
ನಿತ್ಯ ಲಿಂಗಾರ್ಚಕರ ಭತ್ತನಾಗಿರಲೆಂದು
ಮತ್ತೆ ಸಲಹಿದೆ ಗುರುವೆ ಯೋಗಿನಾಥ

ಅರಿವಿನ ಗುಣಪಾಶ ತೊರೆದು ಭಕ್ತಿಯನಿತ್ತು
ನೆರೆ ಘಟ್ಟಗೊಂಡಿರ್ದ ಮುಕ್ತಿಪದವ
ಕರಿಗೊಳಿಸಿ ಮನನದಜ್ಞಾನವ ಛೇದಿಸಿದ
ಗುರುಬಸವ ಶರಣಯ್ಯ ಯೋಗಿನಾಥ

ಸತ್ಯವೆಂಬ ಸಮತೆಯ ನೆಲೆಗೊಂಡ ಶಿಶುವಿಂಗೆ
ಅಂಗತತ್ ಪೃಥ್ವಿಯ ತೊಟ್ಟಿಲಿಟ್ಟು
ಮಿಥ್ಯವಳಿದರಿವೆಯ ಹಾಸಿ ಮಲಗಿಸಿದನು
ಮುಕ್ತ ಬಸವಣ್ಣ ಯೋಗಿನಾಥ

*
ಪರಿವಿಡಿ (index)
Previousಬಸವಣ್ಣನವರೇ ಗುರುವಿಶ್ವಗುರು ಬಸವಣ್ಣನವರ ಸಂಕ್ಷಿಪ್ತ ಪರಿಚಯNext
*